Wednesday, July 16, 2008

နေလကြတ်တာကို ကြိုနေတဲ့ အင်္ဂါစနေဂြိုဟ်စစ်ထိုးပွဲ


နေလကြတ်လို့၊ ဂြိုဟ်စစ်ထိုးလို့ ဘာပဲဖြစ်ဖြစ်၊ ဘယ်လိုရလဒ်ပေါ်ထွက်ပေါ်ထွက် အခြေခံဇာတာခွင်က အဓိကဖြစ်ပါတယ်။ အခြေခံဖွားဇာတာခွင်ရဲ့ကောင်းကျိုးကို ဘယ်လိုရလဒ်ကမှ မလွှမ်းမိုးနိုင်ပါဘူး။ လူတို်င်းဖွားဇာတာရှိထားသင့်ကြပါတယ်။

၂၀၀၈ ဇူလိုင် ၁၁ ရက်၊ သောကြာနေတွင် အင်္ဂါဂြိုဟ်နှင့်စနေဂြိုဟ်စစ်ထိုးခြင်း၊ သြဂုတ်၁ရက်၊ သောကြာနေ့၊ ၀ါဆိုလကွယ်နေ့တွင် နေကြတ်ခြင်း၊ သြဂုတ် ၁၇ရက် တနင်္ဂနွေနေ့၊ ၀ါခေါင်လဆုတ် ၁ ရက်နေ့တွင် လကြတ်ခြင်းတို့နှင့်ပတ်သက်၍ The Voice Weekly Journal ပါ ဆရာမောင်မောင်မြင့်သန်းမောင်၏ အယူအဆများကို တစ်ဆင့်ဖော်ပြလိုက်ပါသည်။

မေး။ ။ အင်္ဂါဂြိုဟ်နှင့်စနေဂြိုဟ်စစ်ထိုးတဲ့အကြောင်း သိချင်ပါတယ်။
ဖြေ။ ။ အင်္ဂါဂြိုဟ်နှင့် စနေဂြီုဟ်ပြိုင်တူယှဉ်ခြင်း Parallel ကို အိန္နိယ၊မြန်မာဗေဒင်တွက်ရိုးများအရ ဂြိုဟ်ချင်း ဂြဟယုဒ္ဓပြုတယ်၊ ဂြိုဟ်ချင်းစစ်ထိုးတယ်လို့ ဆိုပါတယ်။ The American Ephemeris 2001 to 2010 အင်္ဂါဂြိုဟ်ဟာ ကောင်းကင်အီကွေတာက တြန္တီ Declination 10 N 26 စနေဂြိုဟ်ဟာ 11N 46 ရှိနေပြီး ဒီဂရီအံသာပြိုင်နေတဲ့အတွက် ဂြိုဟ်ချင်းပူးတာထက် အားကြီးနေပါတယ်။ Astrology မှာ ဂြိုဟ်ချင်းစစ်ထိုးတာဟာ အလွန်အရေးကြီးပါတယ်။

မေး။ ။ အင်္ဂါနဲ့စနေစစ်ထိုးခြင်းကြောင့် ဘယ်လို ရလဒ်တွေထွက်ပေါ်လာနိုင်သလဲ။
ဖြေ။ ။ Mundane Astrology အရတော့ အင်္ဂါစနေစစ်ထိုးတာဟာ မထူးဆန်းပါဘူး။ ၂ နှစ်ကို တစ်ကြိမ် စစ်ထိုးတတ်ကြပါတယ်။ အရဆိုရင်သူတို့ချင်းစစ်ထိုးတဲ့ရာသီ နဲ့အတန့်ဘာဝပေါ်မူတည်ပြီး ဂြိုဟ်ရဲ့သဘာဝအတိုင်း ထူးခြားတဲ့ရလဒ်တစ်ခုခု ထွက်ပေါ်လာတတ်ပါတယ်။ တကယ်တော့ ဂြိုဟ်ချင်းစစ်ထိုးတယ်ဆိုတာဂြိုဟ်ကြတ်တာပါပဲ။ ဂြိုဟ်ကြတ်တယ်လို့မခေါ်ဘဲ ဂြိုဟ်ချင်းစစ်ထိုးတယ်လို့ ပြောဆိုရေးသားလေ့ရှိလို့ပါ။ နေကြတ်၊လကြတ်ကိုသာ လူသိများပါတယ်။

မေး။ ။ တစ်နှစ်မှာ နေဘယ်နှကြိမ်၊ လဘယ်နှစ်ကြိမ်ကြတ်တတ်ပါသလဲ။
ဖြေ။ ။ တစ်နှစ်မှာ နေနှစ်ကြိမ်ကြတ်လေ့ရှိပါတယ်။ လကတော့ တစ်နှစ်မှာ သုံးကြိ်မ်လောက်ကြတ်တတ်ပါတယ်။ သုံးကြိမ်ထက်ပိုပြီးမကြတ်နိုင်ပါဘူး။ တစ်ခါတရံ တစ်နှစ်အတွင်း တစ်ကြိမ်မှ မကြတ်တာလည်း ရှိပါတယ်။

မေး။ ။ ၂၀၀၈ မှာ နေဘယ်နှကြိမ်၊ လဘယ်နှကြိမ်ကြတ်မှာလဲ။
ဖြေ။ ။ ၂၀၀၈ ဖေဖော်ဝါရီလ ၇ ရက်နေ့တုန်းက တစ်ကြိမ်၊ အခုလာမယ့် သြဂုတ်လ ၁ ရက်မှာ တစ်ကြိမ်၊ စုစုပေါင်းနှစ်ကြိမ်ကြတ်မှာဖြစ်ပြီး ၂ လပိုင်းနေကြတ်တုန်းက မြန်မာနိုင်ငံက မမြင်ခဲ့ရပါဘူး။ ၂၀၀၈ ဖေဖော်ဝါရီလ ၂၁ ရက်နဲ့အခုလာမယ့် သြဂုတ်လ ၁၇ ရက်နေ့တွေမှာ လကြတ်မှာဖြစ်ပြီး ၂ လပိုင်းလကြတ်တုန်းက မြန်မာက မမြင်ခဲ့ရပါဘူး။

မေး။ ။ နေကြတ်၊ လတြတ်မယ်ဆိုတာကို အလွယ်တကူ ကြိုတင်ပြီး ဘယ်ိလိုသိနိုင်မလဲ။
ဖြေ။ ။ နှစ်စဉ်ထုတ်ဝေတဲ့ ဆရာကြီးကာလာစန်ရဲ့ နက္ခတ္တဗေဒ ပညာဆိုင်ရာ ခေတ်မီသိပ္ပံ စံတော်ချိန် သံဒိဌပြက္ခဒိန်မှာ နေကြတ်၊လကြတ်နဲ့ ပက်သက်ပြီး အပြည့်အစုံဖော်ပြထားလို့ လေ့လာဖတ်ရှုမယ်ဆိုရင် အလွယ်တကူကြိုတင်သိနိုင်မှာပါ။ သင်္ကြန်စာကို ဖတ်ရှုမယ်ဆိုရင်လည်း နေကြတ်၊လကြတ်မယ့်ရက်လောက်ကိုတော့ သိရမှာပါ။

မေး။ ။ နေလကြတ်ခြင်း ဘယ်နှစ်မျိုးရှိပါသလဲ။
ဖြေ။ ။ အစိတ်အပိုင်းလောက်သာကြတ်ခြင်း Partial Eclipse ၊ ကွင်းပုံကဲ့သို့ ၀ိုင်းကြတ်ခြင်း Ammular Eclipse၊ နေရောင်ကွယ်ပျေက်အောင်ကြတ်ခြင်း Total Eclipse ဆိုပြီး သုံးမျိုးရှိပါတယ်။

မေး။ ။ လာမယ့် သြဂုတ် ၁ ရက်နေ့နေကြတ်ရာမှာ ဘယ်အချိန်၊ ဘယ်နေရာဘယ်ပုံစံနဲ့ကြတ်မှာလဲ။
ဖြေ။ ။ ဆရာကြီးကာလာစန်ရဲ့ သံဒိဌပြက္ခဒိန်ကို အခြေပြုပြီးပြောရမယ်ဆိုရင် မြန်မာစံတော်ချိန် ၁၅.၃၁.၃၆ မှာစကြတ်ပြီး ကြတ်လယ်ကတော့ မြန်မာစံတော်ချိန် ၁၇.၁၄.၂၄ ဖြစ်ပါတယ်။ လွတ်စင်မယ့်အချိန်ကတော့ ၁၈.၀၄.၁၂ ဖြစ်ပါတယ်။ အစအဆုံးနေကြတ်ချိန် ၂ နာ၇ီ ၄၉ မိနစ်၊ ၃၆ စက်ကန့်ကြာမှာဖြစ်ပါတယ်။ ရုရှားအများစု၊ ဥရောပအများစု၊ မြန်မာနိုင်ငံမှာ အနည်းငယ်တစ်စိတ်တပိုင်းမြင်ရမှာဖြစ်ပါတယ်။ Partial Eclipse နဲ့ကြတ်မှာပါ။
လစတင်ကြတ်မှာကတော့ မြန်မာစံတော်ချိန် နံနက် ၂.၄၀၊ ကြတ်လတ်က နံနက် ၃.၃၅.၃၆ ၊ လွတ်စင်မှာက နံနက် ၄.၅၄.၂၄ ဖြစ်ပါတယ်။ အစအဆုံးလကြတ်ချိန် ၂ နာရီ၊ ၅၀မိနစ်၊ ၂၄ စက်ကန့်ကြာမှာဖြစ်ပါတယ်။ မြင်တွေ့ရမယ့်ဒေသတွေကတော့ အိန္နိယ သမုဒရာ၊ အာရှအများစု၊ သြစတေးလျ၊ အာဖရိက၊ ဥရောပတောင်ပိုင်းအချို့၊ ဘရာဇီးနဲ့အချို့ဒေသတွေအပြင် မြန်မာနိုင်ငံကလည်း အစအဆုံးမြင်ရမယ်လို့ ဆိုပါတယ်။ Partial Eclipse နဲ့ကြတ်မှာပါ။

မေး။ ။ နေကြတ်၊လကြတ်နဲ့ပက်သက်ပြီး ရှေးပညာရှင်ကြီးတွေရဲ့ ဗေဒင်အယူအဆနဲ့ ဟောဆိုခဲ့တာတွေရှိပါသလား။
ဖြေ။ ။ ရှိပါတယ်။ အလွန်ရှေးဟောင်းအိန္နိယဗေဒင်ကျမ်းတစ်စောင်ဖြစ်တဲ့ ၀ရဟာမိဟိရဆရာရဲ့ ဗြို့ဟဇ်သံဟိတကျမ်း၊ အဒျာယ ၅ မှာ ရာဟုဂြိုဟ်အကြောင်းနဲ့ နေလကြတ်ခြင်းရဲ့ အကျိုးအပြစ်တို့ကို ၉၈ ဂါထာရေးသားထားတာကို ဖတ်ရှုနိုင်ပါတယ်။ မြန်မာသရတွက်ရိုးကျမ်းတွေမှာလည်း ရှေးခေတ်က ဗေဒင်ပညာရှင်တွေရဲ့ ယူဆဟောဆိုပုံများကို ဖတ်ရှုနိုင်ပါတယ်။

မေး။ ။ နေလကြတ်တဲ့အတွက် ဘယ်အချိန်ကာလမှာ အကျိုးသက်ရောက်နိုင်ပါသလဲ။
ဖြေ။ ။ Mundane Astrology အရ ပြောရမယ်ဆိုရင် ခြောက်လမှာ တစ်နှစ်အတွင်း နေလကြတ်ခြင်းရဲ့ အကျိုးသက်ရောက်မှု ရှိလာတတ်ပါတယ်။ နေလကြတ်ခြင်းရဲ့ အကျိုးသက်ရောက်မှုဟာ နေကြတ်၊လကြတ်တာကို မြင်ရတဲ့တိုင်းပြည်ဒေသများနဲ့သာ သက်ဆိုင်ပါတယ်။ မမြင်ရတဲ့ တိုင်းပြည်ဒေသတွေနဲ့ မသက်ဆိုင်ပါဘူး။

မေး။ ။ နေကြတ်၊ လကြတ်ရက်ဟာ ရက်ကောင်းလား။ ရက်ဆိုးလား။
ဖြေ။ ။ ရှေးဟောင်း သဗ္မမင်္ဂလာအခါပေးကျမ်းတွေမှာ နေကြတ်၊လကြတ်ပြီး သုံးရက်အတွင်း မင်္ဂလာအခါမလုပ်ရ ဆိုတဲ့ အဆိုရှိပါတယ်။ ဒါပေမယ့် သီရိဓမ္မာ သောကမင်းကြီးဟာ ရေတွင်း၊ ရေကန်၊ စေတီပေါင်း ရှစ်သောင်းလေးထောင်ကို လကြတ်တဲ့နေ့ကစပြီး တည်တာ နောက်တစ်ကြိ်မ် လကြတ်တဲ့နေ့မှ အပြီးသတ်တယ်ဆိုတဲ့ သမိုင်းမှတ်တမ်း အထင်အရှားရှိပါတယ်။ အကောင်းလုပ်ရင် အကောင်း၊ အဆိုးလုပ်ရင် အဆိုးဖြစ်မယ်လို့ ဗုဒ္ဓ၀ါဒက ဆိုထားတယ် မဟုတ်လား။

မေး။ ။ ဒီနှစ် သြဂုတ်လထဲ နေလကြတ်တာနဲ့ ပက်သက်ပြီး ဘယ်လိုယူဟောကိန်း ထုတ်မလဲ။
ဖြေ။ ။ Mundane Astrology အရနေလကြတ်ချိန် ဇာတာခွင်ကို အခြေခံပြီး နေလကြတ်တဲ့ ရာသီနဲ့ဆိုင်တဲ့ တိတ်စွဲတိုင်းပြည်ရဲ့အခြေခံဇာတာခွင်၊ အဲဒီတိုင်းပြည်မှာ အုပ်ချုပ်မင်းလုပ်တဲ့ သူရဲ့ဖွားဇာတာ၊ အားလုံးကို ညှိနိုင်းတွက်ချက် စိစစ်နိင်ပါမှ မှန်ကန်တဲ့ ဟောကိန်းတစ်ခု ထွက်လာမှာပါ။ ဒီနေရာမှာ လူပုဂ္ခိုလ်ရဲ့ဖွားဇာတာဟာ အရေးအကြီးဆုံးဖြစ်ပါတယ်။ Natal Astrology အရလူတစ်ယောက်ရဲ့အကောင်းအဆိုးကို ဟောမယ်ဆိုရင်တော့ ဇာတာရှင်ရဲ့ဖွားဇာတာကို အခြေခံပြီး ဟောဆိုနိုင်ပါတယ်။ နေလကြတ်လို့၊ ဂြိုဟ်စစ်ထိုးလို့ ဘာပဲဖြစ်ဖြစ်၊ ဘယ်လိုရလဒ်ပေါ်ထွက်ပေါ်ထွက် အခြေခံဇာတာခွင်က အဓိကဖြစ်ပါတယ်။ အခြေခံဖွားဇာတာခွင်ရဲ့ကောင်းကျိုးကို ဘယ်လိုရလဒ်ကမှ မလွှမ်းမိုးနိုင်ပါဘူး။ လူတို်င်းဖွားဇာတာရှိထားသင့်ကြပါတယ်။

ဆရာမောင်မောင်မြင့်သန်းမောင်ရဲ့ ပြောဆိုဖြေကြားချက်တွေမှာ သတိထားရမယ့် အချက်တစ်ခုကို သွားတွေ့ပါတယ်။ ဒါကတော့ နေလကြတ်တာ၊ ဂြိုဟ်စစ်ထိုးတာတွေဟာ ဘယ်လိုပဲ တိုင်းပြည်အပေါ်ရလဒ်တွေ သက်ရောက်ပါစေ အုပ်ချုပ်သူလူသားရဲ့ ဖွားဇာတာပါအင်အားကို မကျော်နိုင်ဘူးဆိုတဲ့ အချက်ကလေးက စဉ်းစားစရာပေးသွားပါတယ်။ ဟုတ်လဲဟုတ်ပါတယ်။ နောက်သတိထားမိတာကတော့ ဆ၇ာမြင့်သန်းမောင်ဟာ တကယ့်ဟောရမယ့် နေရာတွေမှာ ရှောင်ပြီးဖြေသွားတာ၊ ကျမ်းတွေဆီလမ်းလွှဲလိုက်တာကို တွေ့ရပါတယ်။ ဂျာနယ်စာရွက်ပေါ် ရောက်မလာနိုင်ခြင်းကို နားလည်နိုင်ပါတယ်။ ဘလော့ဂါတွေလည်း စ်ိတ်ဝင်စားရင် ဗဟုသုတရသွားမယ်လို့ မျှော်လင့်မိပါတယ်။ ကျနော့်ရဲ့မူပိုင် နေလကြတ်ခြင်းအမြင်လေးကို မရေးသားမီ သူများဟာတွေလေ့လာနေရာက တစ်ဆင့်ပြန်ဖောက်သည်ချမိတာတွေပါ။ နေလကြတ်မယ့်အပေါ် ဂျာနယ်တွေက အစဖော်ပေးနေသလို လူတွေကလည်း စိတ်ဝင်တစားစောင့်ကြည့်နေတာကို တွေ့မြင်နေရပါတယ်။

No comments: