Sunday, May 22, 2011

ဆောင်ချင်ရာဆောင် မောင်ဘညောင်

မိတ်ဆွေ ခင်ဗျားအနေနဲ့ ဘာသာရေးလိုလို၊ ဗေဒင်လိုလို၊ မှော်လိုလို မဂ္ဂဇင်းတွေမှာ ဖော်ပြလေ့ရှိတဲ့ အင်းကွက်တွေ၊ စမအက္ခရာတွေကို မြင်ဖူးမယ် ထင်ပါတယ်။ အဲဒီမဂ္ဂဇင်းတွေက အဲလို ဆောင်းပါးတွေမှာ ဖော်ပြထားတဲ့ ဟောဒီ့ အင်းစမ အဆောင်တွေကို မိတ္တူကူး ကော်ပီပွားပြီး ဆောင်လိုက်ရုံနဲ့ ခင်ဗျားဆီကို ရွှေငွေဥစ္စာ ရတနာတွေ ဟိုက ဝင်၊ ဒီကဝင် သပိတ်ဝင် အိတ်ဝင် ဝင်လာမယ်လို့ မစားရဝခန်း ပြောလေ့၊ ရေးလေ့ရှိတာကိုလည်း တွေ့ရနိုင်ပါတယ်။
အဲဒီအင်းစမတွေကို လူအတော်များများက ဘုမသိ၊ ဘမသိနဲ့ ခုပဲ ရတနာပုံ ဆိုက်တော့မလိုလို၊ ခုပဲ ဖုတ်သွင်းရထားက အိမ်ရှေ့တံခါးမကြီးကို ပြေးဆောင့်မလိုလို အဟုတ်မှတ်ပြီး မိတ္တူကူး၊ ကော်ပီပွား၊ ဘုရားစင် ပြေးကပ်၊ အိမ်ရှေ့ကပ်၊ တချို့ကျ အလုပ်စားပွဲကပ်၊ ကပ်ချင်တိုင်း ကပ်လိုက်ကြတာ အဲဒီ အဆောင်တွေ ကူးလိုက်၊ ကပ်လိုက် လုပ်နေသူတွေတော့ မသိဘူး။ မိတ္တူဆိုင်၊ ကွန်ပျူတာဆိုင်တွေတော့ တော်တော်လေး အလုပ်ဖြစ်ခဲ့တာ တွေ့ဖူးပါတယ်။


တချို့ ရှားရှားပါးပါး ပညာရှင်တွေ ကတော့ မဂ္ဂဇင်းမှာ ရေးဖြစ်ခဲ့ရင်တောင် ဒီအဆောင်ကို ပြုလုပ်ရတာ ခက်ခဲ ပင်ပန်းလွန်းလှကြောင်း၊ ကော်ပီကူး ဆောင်ရုံနဲ့ ထူးလာမှာ မဟုတ်ကြောင်း ရိုးရိုးသားသား အသိပေး တတ်ကြပါတယ်။ ဒါပေမဲ့ ရှိတယ်၊ ရှားတယ်ဆိုတဲ့ ဆောင်းပါးကောင်းတွေ ဖြစ်ပါတယ်။

အော် ဒါဆို အဲဒီမဂ္ဂဇင်း စာမျက်နှာတွေပေါ်က အင်းမစရုပ်တွေ၊ အဆောင်ပလောင်တွေက မစွမ်းလို့လား၊ အဓိပ္ပါယ် မရှိ လျှောက်ပြီး လက်ကမြင်းထားတာလား၊ အားတိုင်းယားတိုင်း စာမူခ ရအောင် လျှောက်ရေး နေတာလားလို့ မေးခွန်း ထုတ်စရာ ရှိပါမယ်။

စွမ်းတယ်၊ မစွမ်းဘူး ဆိုတာ ကျွန်တော် မဖြေပါဘူး။ အဲလို မဂ္ဂဇင်းက အဆောင်တွေကို ဟိုကပ်ဒီကပ် အမြတ် မထွက်ချင်နေ၊ အရှုံးတော့ မရှိလောက်ဘူး ဆိုပြီး ဆောင်ခဲ့ဖူးသူများ ရှိခဲ့ရင် ကျွန်တော် မေးတာလေး ပြန်ဖြေပါ။ အဲဒီအဆောင်က ဘယ်နှလ အတွင်း အစွမ်းပြခဲ့သလဲ။ လောက်လောက်လားလား ချမ်းသာ သွားသလား၊ ထူးထူးခြားခြား ရွှေထုပ်ငွေထုပ်တွေ ရခဲ့ကြ သလား၊ ငုတ်တုတ်ထိုင်နေရင်း ပိုက်ဆံသိန်းသန်းချီ ဝင်လာပါသလားလို့။

အင်းတစ်ချပ်မှာဆိုရင် အင်းကျိုး၊ အင်းကန်း၊ အင်းပေါက် အစရှိတဲ့ စည်းမျဉ်းပေါင်းများစွာ ရှိနေသလို အင်းတစ်ကွက် စီရင်ဖို့ အချိန်အခါ၊ နက္ခတ် သင့်မသင့်၊ စီရင်သူရဲ့ သီလ၊ သမာဓိအင်အား၊ လုပ်နည်း လုပ်ဟန် တိကျမှန်ကန်မှုတွေ ပြည့်စုံအောင် လေ့လာဆည်းပူး အားထုတ်ပြီးမှ စီရင်ကြပါတယ်။ ပညာကို ပညာနဲ့ တူအောင် လေ့လာလိုက်စားဖူးသူတိုင်း ကျွန်တော် ဘာကို ပြောနေသလဲ သဘောပေါက် လွယ်မှာပါ။


တချို့သော စမအက္ခရာတွေဆိုရင်လည်း အဲဒီလိုပါပဲ။ ပန်းချီတတ်တိုင်း၊ လက်ရေးလှတိုင်း လျှောက်ရေးဆွဲလို့ မရတဲ့၊ ကော်ပီကူး၊ အိတ်ထဲထည့်၊ ဟိုထည့် ဒီထည့် ဆောင်လို့ မရတဲ့ အဆောင်တွေ၊ စီရင်တည်းက ခက်ခက်ခဲခဲ ဖန်တီးရေးဆွဲရတဲ့ စမတွေ ရှိပါတယ်။ ဥပမာ ပဋ္ဌာန်းနဂါး ဆိုတဲ့ စမရုပ်ပုံတော်ကြီးဆိုရင် ဆွဲသားရတာကအစ ၊ စီရင်ပုံအဆုံး သိပ်ကို ခက်ခဲ လွန်းပါတယ်။

သူရိယသဟာယပညာမှာ ဆိုရင်လည်း စီရင်မယ့်နေ့ဟာ နှစ်ဆန်းတစ်ရက်နေ့လည်း ဖြစ်၊ လဆန်း တစ်ရက်လည်းဖြစ်၊ တနင်္ဂနွေလည်း ဖြစ်ရမယ်လို့ ဆိုပါတယ်။ ဒါ့အပြင် ဆွဲမယ့် ရွှေပြားပေါ်မှာ အက္ခရာ တစ်လုံးချင်းကို နေထွက်ချိန်၊ မွန်းတည့်ချိန် ကနေ ကြယ်ကြွေချိန်အထိ တိတိကျကျ အဆုံးသတ် ပေးရပြန်ပါတယ်။ ဆွဲမယ့်ဒေသကလည်း မိုးကုတ်စက်ဝိုင်းကို ရှင်းလင်း ပြတ်သားစွာ မြင်နိုင်မယ့်နေရာ ဖြစ်ရမယ်လို့ ဆိုထားပါတယ်။

စဆွဲရာကနေ ကညစ် မကြွ၊ အသက်အောင့်ထားရင်း၊ အဆုံးထိ တရစပ် ရေးဆွဲရတဲ့ စမ၊ မုဆိုးထိုင် ထိုင်ပြီး ဆွဲရတဲ့ စမ၊ ဂါထာအစကနေ အဆုံးထိ အပြီးမှ တပြိုင်တည်း ဆွဲသား ပြီးစီးရတဲ့ စမ၊ ငှက်ပျောအူတိုင်ထဲ မန္တန် ရွတ်ပြီး ရိုက်ထည့်ရတဲ့ စမ၊ မေတ္တသုတ်တော် ရွတ်ရင်း ဝအက္ခရာနဲ့ ဖန်တီးသွားတဲ့ စမ အစရှိသဖြင့် စုံလင် ကျယ်ပြန့်လှပါတယ်။ ဒီလို ထူးဆန်းတဲ့ စည်းမျဉ်းတွေ၊ ပုံသဏ္ဍာန်တွေကို ရှေးပညာရှင်တွေက အပျင်းပြေ လျှောက်ရေးခဲ့တာတော့ မဟုတ်လောက်ဘူးလို့ ကျွန်တော် ယူဆပါတယ်။

တခါတလေ အဆောင်တွေ ဆောင်ရပြုရတာ ဝါသနာထုံတဲ့ ၊ အဆောင်မှ အဆောင်ဆိုတဲ့ အထီးအမ ပုပုရှည်ရှည် လူတွေကို ဆုံရတိုင်း အဘမင်းသိင်္ခရဲ့ ဖြစ်ချင်ရာဖြစ် မောင်ဘချစ် စကားအတိုင်း ပြန်ထေ့ မိပါတယ်။ ဒီအဆောင်လေးက ငွေခေါ်တယ်၊ လာဘ်ရွှင်တယ်၊ ဒီအင်းချပ်ကတော့ ဆော်ကြည်တဲ့ ပီယသျှို အဆောင်၊ ဒီစမကဖြင့် ဘေးရန်ကင်းတယ် ဆိုတဲ့ မယောင်ရာဆီလူး ပုဂ္ဂိုလ်တွေကို ကျွန်တော် ပြန်ပြော မိတာက ဆောင်ချင်ရာဆောင် မောင်ဘညောင်.. တဲ့။

မိတ်ဆွေ ခင်ဗျားကော အဲဒီမောင်ဘညောင်တွေထဲ ပါနေသလားဗျာ။ ပါနေတယ်ဆိုရင်တော့ ခင်ဗျားဟာ အလိမ်ခံရဖို့ ၉၉.၉၉ ရာခိုင်နှုန်း ကျိန်းသေနေပြီလို့ ဝမ်းပန်းတနည်း ပြောလိုက်ပါရစေ။

(ဒီစာစုလေးနဲ့အတူ ကျွန်တော် အထက်တန်း ကျောင်းသားဘဝက လေ့လာမှတ်သားခဲ့ဖူးတဲ့ မဟေသြ ဘေသြကျမ်းပါ ရုပ်ပုံတွေကို ဖော်ပြလိုက်ပါတယ်။ ဒီကျမ်းစာအုပ်ဟာ အနောက်နိုင်ငံက ပြတိုက်တစ်ခုမှာ ရှိနေတယ်လို့ မှတ်သားဖူးပါတယ်။ ဒီကျမ်းကို သိရှိသူ၊ ပိုင်ဆိုင်ထားသူများ ဆက်သွယ်နိုင်ပါတယ်။)

5 comments:

Numan said...

ကောင်းတဲ့ အသိပေး ဆောင်းပါးလေးပါ ကိုရန်းဂန်း ရေ၊
အင်း စမ တွေရဲ့ စည်းကမ်းမှာ- အ၀င်၊ အထွက်၊ ခါးပါတ်၊ နက္ခတ်တို့သာ မက- အမြင်၊ အကန်းတွေပါ နားလည် တွက်ချက်ရာမှာ ဖြစ်ပြီး - နက္ခတ်မမှန်ခြင်း အားဖြင့် အင်းကန်းခြင်း၊ သီလ သမာဓိ၊ အာရုံပြန့်လွင့်မှု မမှန်သဖြင့် အင်းကျိုးခြင်း စတဲ့- အင်းကန်းခြင်း ၈-ပါး၊ အင်းကျိုးခြင်း ၈-ပါး၊ အင်းပေါက်ခြင်း ၈-ပါး တို့ပါ ရှိတဲ့ အတွက်- မိတ္တူကူး ဆောင်မယ် ဆိုယင်တော့- တနည်းအားဖြင့်- စိတ်ဓါတ်ပိုင်းဆိုင်ရာ မြှင့်တင်ခြင်း Motivation အနေနဲ့ အထောက်အကူ ဖြစ်နိုင်တာကလွဲလို့- အခြား တစ်စုံတစ်ရာ အကျိုးများဘို့တော့ မမြင်မိပါ။ အဆင်မသင့်ယင်- အနောက်တိုင်းက Lucifer တို့ Saturn တို့ကို ကိုးကွယ်တဲ့ မိစ္ဆာ ပညာနဲ့များ ဆက်စပ်သွားခဲ့ယင်- မကောင်းတဲ့ အနေအထား ဖြစ်သွားတတ်ပါတယ်။ အကောင်းဆုံးက - ရတနာ သုံးပါး အဆောင်၊ သရဏဂုံ အဆောင်ပဲ ဖြစ်တယ်လို့ မြင်ပါတယ်။

ကောင်းကင် said...

ဟုတ်ကဲ့ အစ်ကိုရေ.. ကျွန်တော်လဲ အစ်ကိုပြောတာတွေ လက်ခံပါတယ်။ ဒါပေမယ့် မရှင်းလို့ မေးခွင့်ပြုပါနော်။ ကျွန်တော်လဲ အဘမင်းသိင်္ခဆီမှာ ပညာရည်နို့ သောက်ခဲ့ဖူးပါတယ်။ အဘ တပည့်တွေဆီမှာ ဗေဒင်သွားမေးရင် အဆောင်၊အင်းတွေနဲ့  ပတ်သတ်ပီး ကော်ပီကူးပီးဆောင်ဖို့ ပြောတာ ကြုံလေ့ရှိပါတယ်။ ဒီလိုဆောင်ရုံနဲ့  ဖြစ်မလာမှန်းတော့ သိပါတယ်။ ဒါပေမယ့် ဆရာတွေက အဲလိုဆောင်ခိုင်းကြတယ်။ အဲဒါကို အစ်ကို့ အမြင်လေး သိချင်လို့ ပါ။
ခင်မင်စွာဖြင့်
စောဝင်းထူး

ဟိန်းတင့်ဇော်(ဗလာ) said...

စာလာဖတ်သွားပါတယ် မိတ်ဆွေကြီးခင်ဗျာ....
လေးစားခင်မင်လျှက်ပါ။

Younggun said...

>>ဆရာဟိန်းရေ.. လာလည်သွားတာ ကျေးဇူးပါခင်ဗျာ။ >>ကိုစောဝင်းထူးရေ. တခြားသူတွေရဲ့ ခံယူချက်တွေ အမြင်တွေ ဘယ်လိုရှိမယ်၊ ဘယ်လို သဘောထားတယ် ဆိုတာ ကျွန်တော် မဝေဖန်လိုပါဘူး။ သူ့သဘော သူဆောင်နေကြတာပါပဲ။ ဒါပေမဲ့ ကိုယ့်ပရိတ်သတ်ကို တကယ် အကျိုးရှိစေချင်ရင် ကြက်ကန်းဆန်အိုးတိုးတဲ့ အစွမ်းမျိုးထက် ပေပေါ်တင် အစမ်းခံရဲတဲ့ ဘာမထီ အစွမ်းမျိုး ပြစေချင်ပါတယ်။

ကောင်းကင် said...

ဟုတ်ကဲ့အစ်ကို။
လမ်းညွန်ပေးတဲ့အတွက်
ကျေးဇူးအထူးတင်ပါတယ်။
:)