Tuesday, June 21, 2011

ဘူမဟုတ်တဲ့ တစ်ဆယ်

ဂဏန်းဆယ်လုံး ပေါင်းခြင်းကို ကြည့်ရင် ၅၅ ကို မြင်ရမှာပါ။ ၅၅ ကို လက်ဖဝါး ဘယ်၊ ညာ နှစ်ဖက်ပေါင်းခြင်း၊ တမျိုးပြောရရင် ညာလက်က မျိုးစေ့ကို ချပြီး ဘယ်လက်က ပေါင်းသင် မြက်ရှင်း ရှင်သန်ခြင်းကို ကိုယ်စားပြုပေးတယ်လို့ ဆိုပါတယ်။

ဆယ်ကျော်သက်အရွယ်တုန်းက သူငယ်ချင်းတွေ စုပြီး ဖဲရိုက်ကြရင် ရှမ်းတွေ၊ ပိုကာတွေ မဆွဲတတ်ကြတော့ ဘူကြီးပဲ ရိုက်လေ့ ရှိပါတယ်။ အဲဒီမှာ ဂဏန်း ပေါင်းခြင်းက တစ်ဆယ်၊ နှစ်ဆယ် ဆိုတဲ့ ဆယ်ဂဏန်းတွေ ကျလို့ကတော့ သေထား.. ဘူကြီးကွ ဆိုပြီး ဝမ်းသာအားရ အော်ခဲ့ကြပါတယ်။ အသက်ကလေး နည်းနည်း ကြီးလာပြန်တော့ အလုပ်ထဲ၊ အရပ်ထဲမှာ အပျင်းပြေ ပိုက်ဆံ ပွတ်ကြတဲ့အခါ ဘူကြီးနဲ့ ပြန်ဆုံပါတယ်။ လက်ဖက်ရည်ကြေး၊ စီးကရက်ကြေး ဘူကြီး ပွတ်တိုင်း ဆယ်ဂဏန်း မြင်ရင် ဘူလို့ တစ်ထစ်ချ ပျော်ရွှင် ခဲ့ပါတယ်။

ဘာ့ကြောင့် တစ်ဆယ်ကို ဘူလို့ ခေါ်ဝေါ် ပြောဆိုကြသလဲ ခုထိ ကျွန်တော် နားမလည်သေးပါဘူး။ ဒါပေမဲ့ လေ့လာမိသလောက် ဂဏန်းသင်္ချာဗေဒမှာ ဘူဆိုတာကို လှပတဲ့ တစ်ဆယ်ဂဏန်းအဖြစ် တွေ့မြင်ရပါတယ်။ ဥပမာ လူသိအများဆုံး တားရော့စကားနဲ့ ပြောရရင် Wheel of Fortune ကံကြမ္မာလှည်းဘီးဆိုတဲ့ နံပါတ်တစ်ဆယ်မြောက် တားရော့ကတ်ကို ပြေးမြင်မိကြမှာပါ။

၁+၂+၃+၄+၅+၆+၇+၈+၉+၁ဝ = ၅၅ = ၁ဝ

ဂဏန်းဆယ်လုံး ပေါင်းခြင်းကို ကြည့်ရင် ၅၅ ကို မြင်ရမှာပါ။ ၅၅ ကို လက်ဖဝါး ဘယ်၊ ညာ နှစ်ဖက်ပေါင်းခြင်း၊ တမျိုးပြောရရင် ညာလက်က မျိုးစေ့ကို ချပြီး ဘယ်လက်က ပေါင်းသင် မြက်ရှင်း ရှင်သန်ခြင်းကို ကိုယ်စားပြုပေးတယ်လို့ ဆိုပါတယ်။ နေနဲ့လအဖြစ် စဉ်းစားကြည့်ရင် ညာဘက်ဟာ နေမင်း ဖြစ်ပြီး ဘယ်ဘက်ဟာ လမင်း ဖြစ်ပါတယ်။ ဒီတော့ နှစ်ဖက်ပေါင်း ရလာတဲ့ ၅၅ = ၁ဝ ဂဏန်းဟာ နေနဲ့လရဲ့ တမန်တော်လို့ ဆိုရမှာပါ။

ဒါ့အပြင် (၁ဝ) ဂဏန်းကို ဋီကာချဲ့ ကြည့်ရင် - ၄ နဲ့ + ၆ ဆိုတဲ့ ဟာမိုနီအတွဲကို မြင်တွေ့ရပါမယ်။ ဒါ့အပြင် ခရစ်ယာန်ကျမ်းလာ ခမည်းတော်၊ သားတော်နဲ့ ဝိညာဉ်တော် ၃ ဦးနဲ့ ဖန်ဆင်းမှု ၇ ပါး ၃+၇ = ၁ဝ ကို မြင်တွေ့ရဦးမှာပါ။ ဂဏန်းဗေဒင်ပညာမှာ ဧကော ဂဏန်းတွေ စဉ်ချ တွက်ချက်တဲ့အခါ တစ်ကနေ ကိုးအထိ ပြီးဆုံးပြီး တစ်ဆယ်ကိုတော့ စက်ဝိုင်းတစ်ပတ်ပြည့် ဖြစ်စဉ်အဖြစ် ယူဆကြပါတယ်။ တစ်ပတ်ပြည့်တာ ကိုလည်း ဆုံးခန်းတိုင် ပြီးမြောက်မှုအဖြစ် သမုတ်ကြပါတယ်။ ဒါ့ကြောင့် ဂန္ဓာရီတက်စဉ်က အဆင့်အကူး အပြောင်းမှာ ရှေးဟောင်းအီဂျစ်လောကီပညာဂိုဏ်းတွေက (၁ဝ) ရက် အဓိဋ္ဌာန်ဝင်ပြီး ကျင့်ကြံ အားထုတ် ကြပါတယ်။

ဘာသာရေးတွေမှာလည်း (၁ဝ) ဂဏန်းရဲ့ ပါဝင် ပက်သက်မှုကို တွေ့ရပါတယ်။ ခရစ်ယာန်သမ္မာကျမ်းစာမှာ (၁ဝ) ဂဏန်းကို ၂၄၄ ကြိမ် တွေ့ရပါမယ်။ ပေါင်းကြည့်ရင် (၂+၄+၄= ၁ဝ) ပဲ ဖြစ်နေပါတယ်။ (၄ဝဝဝ) ဂဏန်းကိုတော့ (၁ဝ) ကြိမ် ပြန်သုံးထားပါတယ်။ ကိုရမ်ကျမ်းစာမှာလည်း (၁ဝ) ဂဏန်းကို (၈) ကြိမ် ပြန်သုံးထားပါတယ်။ ဟုတ်မဟုတ် သိချင် လှန်သာ ရှာပေတော့။

ဂမ္ဘီရဆန်တဲ့ ဂဏန်းသင်္ချာဗေဒမှာ (၁ဝ) ဂဏန်းဟာ ရှင်ပြန်ထမြောက်တယ်၊ ဥာဏ်အလင်း ပေါက်လာ တယ်လို့ ဖော်ပြပါတယ်။ မိမိကိုယ်ကို ထွင်းဖောက် သိမြင်တာကိုလည်း ကိုယ်စားပြုနေပါတယ်။ ခရီးစဉ် ပြီးဆုံးတာ၊ မူလဇာတိကို ပြန်ရောက်လာတာတွေကိုလည်း ဒီဂဏန်းက ဖော်ညွှန်းနေပါတယ်။ မူလပြန် တယ်လို့ မြန်မာဂန္ဓာရီစကားမှာ ခေါ်ဝေါ်တတ်ပါတယ်။

နံပါတ် (၁ဝ) ကို ထပ်ပြီး ဓာတ်ခွဲရရင် ဒီဂဏန်းထဲက နံပါတ်တစ်ဟာ ကနဦး၊ ဖန်ဆင်းရှင်၊ တီထွင်သူ၊ ရှေ့တော်ပြေး၊ ပုန်းကွယ်နေတဲ့ ဥာဏ်ပညာ၊ အနှစ်သာရ အချုပ် ဖြစ်ပါတယ်။ သုညကတော့ လုံးဝဥဿုံ ပြောင်းလဲမှု၊ အစွန်းရောက်မှု၊ ပျောက်ကွယ်မှု၊ မရှိတရား၊ အကန့်အသတ်မဲ့၊ ပြီးပြည်စုံမှု၊ နတ်ဘုရားတွေရဲ့ စကားသံ.. လို့ ဖော်ပြထားပါတယ်။

မြန်မာ့ရိုးရာ ဗေဒင်ပညာ၊ ဓာတ်ပညာတွေမှာ (၁ဝ) ဂဏန်းကို အန္တော- မီးဓာတ်လို့ ဆိုကြပါတယ်။ အဘ အောင်မင်းခေါင်ကြီးရဲ့ သံပေါက်လင်္ကာမှာလည်း အန္ထောဓာတ် အရင်းခြေမှာ ဝံသေဟာ သူနှောက်တော့ ကိုးပါးမြောက် ဘုရားဂုဏ် လုံးဝဥဿုံလို့ ဖွဲ့ဆိုသွားပါတယ်။

ကဲ.. (၁ဝ) ဂဏန်းရဲ့ သရုပ်ကိုတော့ ဟိုတို့ ဒီဖော်နဲ့ ပေါ်တော်မူပြလိုက်ပါတယ်။ ကိုယ့်ထက် အများကြီး တတ်သိ နားလည်တဲ့ ပညာရှင်များ၊ ဆရာကြီးများလည်း ကျွန်တော့် ဒီစာစုမှာ အမှားအယွင်း၊ တလွဲတချော်တွေ မြင်တွေ့ခဲ့ရင် အမှန်ကို ထောက်ပြပေးကြပါဦး။ ဖြည်းဆည်းပေးကြပါဦး။ ကျွန်တော် ကတော့ ကိုယ်လက်လှမ်းမီသလောက် အချိန်ရသလောက် ဘူမဟုတ်တဲ့ တစ်ဆယ်အကြောင်းကို မီးမောင်း ထိုးပြလိုက်ပြီ။

No comments: