Tuesday, November 8, 2011

ဘာဖြစ်မှာလဲ (၁၁.၁၁.၁၁)

အဲသလို ၁၁.၁၁.၁၁ နဲ့ ပက်သက်တဲ့ ချီးမွမ်းထောပနာတွေ၊ ခြောက်လုံးလှန့်လုံးတွေ ဖတ်ရှုအပြီးမှာ တမူထူးခြားတဲ့ အယူအဆတစ်ခုကိုလည်း ဂဏန်းဗေဒင် ပညာရှိတစ်ဦးက တင်ပြထားပြန်တယ်။

(၁၁) ရက်၊ (၁၁) လ၊ (၂ဝ၁၁)၊ ဒါထက်မက ကဲပြရရင် ၁၁ နာရီ၊ ၁၁ မိနစ်တိတိဟာ ဂဏန်းသင်္ချာ ဗေဒင်ဆရာတွေအဖို့ ရင်ခုန်စရာ ကောင်းနေသလို ဂဏန်းတွေကိုမှ စိတ်ပါဝင်စားသူ ကျား၊မများ အဖို့လည်း စိတ်လှုပ်ရှားစရာ ဖြစ်နေမှာ အသေချာပါပဲ။ တစ်ကမ္ဘာလုံးမှာ တစ်တစ်တစ်တစ်နဲ့ တစ်ပြီးရင်း တစ်နေ လိုက်ကြတာ တွေ့ရပါတယ်။ တစ်ဂဏန်းတွေ ဒီလောက် ထပ်နေတော့ ဘာဖြစ်မလဲ၊ မိုးပဲ ပြိုမလား၊ မြေပဲကျွံကျမလား၊ ရေပဲ လျှံတက် လာမလား၊ ကောင်းကင် ပေါ်က ဂြိုဟ်သားတွေပဲ ခုန်ဆင်း လာမလား၊ မနက်ဖြန်ပဲ ရတနာပုံကိန်း ဆိုက်မလား၊ သန်ဘက်ခါပဲ မွဲပြာကျမလား စိတ်ကူးယဉ်စရာတော့ ကောင်းနေပါရဲ့။


အံ့ချီးမကုန် ၁၁.၁၁.၁၁


ကိုယ်က နက္ခတ်တွေ၊ ဂြိုဟ်တွေနဲ့မှ ပျော်မွေ့လေသူ ဆိုတော့ အဲဒီနေ့ သေချာ ပြောရရင် အဲဒီနာရီမိနစ်ကို ဇာတာနဲ့ ဘာနဲ့ ကျကျနန တွက်ချက်ထားလေသူ ဆြာအပေါင်းရဲ့ အပြောအဆို၊ တော်ကီတွေကို လျှောက်ဖတ် ကြည့်မိပါတယ်။ သူတို့ အဆိုအရ အဲဒီနေ့မှာ ဘာသာရေး၊ ဒဿန အတွေးအခေါ် ရှေ့ဆောင် လမ်းပြ ပုဂ္ဂိုလ်တွေ၊ ခေါင်းဆောင်ကြီးတွေ လုပ်ကြံသတ်ဖြတ်ခံရနိုင်တယ်၊ မကျေနပ်မှု၊ ပေါက်ကွဲ အုံကြွမှု၊ ဆူပူသောင်းကျန်းမှုတွေ ဖြစ်တည်လာနိုင်တယ်လို့ ကြောချမ်းဖွယ် တင်ပြ ထားပါတယ်။


ဂဏန်းဗေဒင် ပညာရှိတွေကတော့ (၁၁) ဂဏန်းဟာ အစတည်းက မာစတာဂဏန်း ဖြစ်ပြီး ရိုက်တာဝိတ်တီး တားရော့မှာ Strength နဲ့ Justice ကဒ်ကြား ဖလှယ် နှီးနွယ်မှုလည်း ဖြစ်တယ်လို့ ဆိုကြပြန်တယ်။ ပြောချင်တာက တရားမျှတမှုတွေ ရှင်သန်ထွန်းကားဖို့ ခွန်အားစွမ်းပကားတွေလည်း လိုအပ်တယ် ဆိုတာပါပဲ။ ၁ နှစ်လုံးကို ပေါင်းချလိုက်တော့ (၂) ထွက်လာတယ်။ (၂) က တားရော့မှာ သီလရှင်မကြီးပေါ့ဗျာ။ ခွန်အားဗလနဲ့ ချိန်ခွင်လျှာ ညီမျှခြင်းကို ထိုးပေးလိုက်တော့ ကိုယ့်မသိစိတ်က ပေါ်ထွက်လာတဲ့ အကြံဥာဏ်ကို လက်ခံဖို့နဲ့ ဒါကို ရဲရဲဝံ့ဝံ့ ပစ်ယုံလိုက်ဖို့ တိုက်တွန်းထားတာ ဖြစ်တယ်လို့ ဂဏန်းဗေဒ ပညာရှိတွေက ဆိုကြပါတယ်။


လွဲချက်ကယ်နာ ၁၁.၁၁.၁၁


အဲသလို ၁၁.၁၁.၁၁ နဲ့ ပက်သက်တဲ့ ချီးမွမ်းထောပနာတွေ၊ ခြောက်လုံးလှန့်လုံးတွေ ဖတ်ရှုအပြီးမှာ တမူထူးခြားတဲ့ အယူအဆတစ်ခုကိုလည်း ဂဏန်းဗေဒင် ပညာရှိတစ်ဦးက တင်ပြထားပြန်တယ်။ ရန်းဂန်း အကြိုက် အယူအဆပေါ့ဗျာ။ တခြားရှုထောင့်တစ်ဖက်က ကြည့်ရင်တော့ အဲဒီနေ့ဟာ ထူးမခြားနား သာမန်နေ့ ပါပဲလို့ အဲဒီပညာရှိက သုံးသပ်တယ်။ ကြည့်လေဗျာ။ ၁၁.၁၁.၂ဝ၁၁ ကို ရူးသလို ပေါသလိုနဲ့ ၁၁.၁၁.၁၁ ဆိုပြီး နှပ်ချထားတာ။ ၂ဝ၁၁ ကို အရူးကွက်နင်းပြီး ၁၁ ပဲ ပြထားတာ။ ၂ဝ၁၁ ထဲက ၂ဝ ကို ဖြုတ်ချ ထားရုံနဲ့ ၂ဝ၁၁ က ၁၁ ခုနှစ် ဖြစ်မသွားပါဘူး။ တကယ့်ဂဏန်းဗေဒင် စစ်စစ်မှာ ၂ဝ ကို ချန်မထားဘဲ အမှန်အကန် ၂ဝ၁၁ ကို အပြည့်အစုံ ယူပြီး တွက်ချက်ယူကြတယ်၊ သူများရူးလို့ လိုက်ပေါ နေကြတဲ့ အတိုင်း ၁၁.၁၁.၁၁ ဆိုပြီး ရမ်းမဖြီးဘူးလို့ အများနဲ့မတဲ့ ခပ်မိုက်မိုက် အယူအဆကို ဖော်ထုတ် သူတွေကိုလည်း တွေ့ရတယ်။


ကျွန်တော်ကတော့ ဘယ်ဂဏန်းတွေ ဘယ်လောက် ပူးပူး၊ ဘာကြီးတွေ ဘယ်လိုပဲ ထူးဆန်းပြပြ၊ စိတ်ဝင်တစား မျက်လုံးပြူးသွားတယ်လို့ ခပ်ရှားရှားပါ။ တစ်ခါတုန်းက ဖတ်ဖူးတဲ့ ဘာသာရေးစာအုပ် တစ်အုပ်မှာ လူတွေက ဟိုနေရာမှာ ဘယ်ကိုယ်တော်က ရေဆွမ်းပဲ ဘုန်းပေးတယ်၊ ဘယ်ပုဂ္ဂိုလ်က အာရုံနဲ့ အဘ ပင့်ပြီး ဟောတာ၊ ဘယ်ယောဂီက တန်ခိုးစွမ်းပြတာ၊ ဘယ်ဗေဒင်ဆရာက ကွက်တိဟဲ့ ဆိုတဲ့ ထူးထူးဆန်းဆန်းတွေ နောက်ကိုပဲ တကောက်ကောက် မမောမပန်း လိုက်နေကြတယ်။ သံသရာနဲ့ ယှဉ်ရင် အသေးအဖွဲလို့ မမြင်ဘဲ အထူးအဆန်းနောက်ကို အရူးအနှမ်းတွေက လိုက်နေကြတာ အင်မတန် သနားစရာ ကောင်းတယ်လို့ ဝေဖန်ပြထားတာ ဖတ်မိပါတယ်။ မိတ်ဆွေတို့ရော လူတွေ ဖန်တီးခဲ့တဲ့ အတိုင်း တစ်ဂဏန်းတွေ ပူးပြတာကို ထူးနေ ဆန်းနေတုန်းလားဗျာ။

No comments: