Friday, March 16, 2012

အချစ်ရေ...ဗေဒင် မမေးနဲ့ ငွေကုန်တယ်

မိတ်ဆွေတို့အနေနဲ့ ကိုယ့်မှာ ချစ်သူ (အမှန်အကန် ရင်ခုန်သံ မြန်စေသူ)နဲ့ လက်တွဲကြပြီ ဆိုရင် ဗေဒင်ဆရာဆီ ပြေး၊ ဇာတာချင်း တိုက်ဆိုင်တာထက် ကိုယ့်နှလုံးသားကို ကိုယ်တိုင် ဇာတာဖွဲ့ပြီး စစ်ဆေး သင့်ပါတယ်လို့ အကြံပြုပါတယ်။

အဲသလို ခေါင်းစဉ် တပ်လိုက်တော့ ဥာဏ်ပူဇော်ခ ယူပြီး ဗေဒင်ဟောနေတဲ့ ကိုယ့်ဆရာတို့က မျက်စောင်းထိုး၊ ဓားကြိမ်း ကြိမ်းနိုင်ပါတယ်။ မင်းရော အာရကေ မယူဘဲ ဟောနေလို့လား၊ ရေခိုင်မှ နေနိုင်မှာကွ ဆိုပြီး တော့လည်း ပြန်ဘုတောနိုင်ပါတယ်။ ဟုတ်ပါရဲ့၊ ကျွန်တော်တောင် တခါတလေ မတောင်း ပေမယ့် ရလာတဲ့ ဗေဒင်ဟောခ ငွေတိုငွေစလေးတွေ စုပြီး သောက်ပစ်၊ လှူပစ် လုပ်လေ့ ရှိပါတယ်။

အတိတ်တခါတုန်းက ဗေဒင်မေးရင် ဥာဏ်ပူဇော်ခအဖြစ် ဆန်တစ်ပြည်ငွေတစ်မတ် သတ်မှတ်တယ်လို့ ကြားဖူးပါတယ်၊ အဲဒါကြောင့်လည်း ဗေဒင် မမေးနဲ့ ဆန်ကုန်တယ် ဆိုတဲ့ ရိုးရာစကားလေး နူတ်ဖျားစွဲ နေကြတာပါ။ အခုခေတ်မှာတော့ ဆန်တောင်းတဲ့ ဗေဒင်ဆရာ မတွေ့ဖူးပါဘူး။ ဥာဏ်ပူဇော်ခချည်း အုပ်တဲ့ ဗေဒင်ဆရာတွေပဲ ရှိပါတော့တယ်။ ထားပါတော့။ အခု ပြောချင်တဲ့ အကြောင်းအရာက တချို့ ဗေဒင် မေးသူတွေရဲ့ မေးခွန်း တွေဟာ ဗေဒင်ဆရာဆီ သွားစရာ မလိုဘဲ ကိုယ့်ဖာသာ ပြန်သုံးသပ်သင့်တဲ့ အကြောင်းပဲ ဖြစ်ပါတယ်။

(ကျွန်တော့်အတွေ့အကြုံအရ) အချစ်ရေးနဲ့ ပတ်သက်လို့ မေးတဲ့ ဗေဒင်မေးသူ တော်တော်များများ အထူးသဖြင့် ရည်းစားကို အဖြေပေးရုံမက ဘာညာပါ သာရကာ လှူပြီးလောက်တဲ့ ကောင်မလေးတွေ၊ ကောင်မကြီး (အဲလေ ရိုင်းပါတယ်) အပျိုကြီးတွေဟာ သူတို့ မောင်တော်တွေနဲ့ သူတို့နဲ့ ဇာတာချင်း ကိုက်ပါ့မလား၊ နေ့နံသင့်ပါ့မလားဆိုတာ ဗေဒင်မေးတာမျိုး မဟုတ်ဘဲ ထောက်ခံစာ တောင်းသလိုမျိုး မေးတတ် ကြတယ် ဆိုတာပါပဲ။

ဒီနေရာမှာ ရယ်ရမလို ငိုရမလို ဖြစ်တာက သူတို့နဲ့ သင့်ပါတယ်၊ ကောင်းပါတယ် ဟောလိုက်လို့ကတော့ မျက်နှာကြီးတွေက ဟယ် အိုရချေသေးရဲ့ ဆိုတဲ့ ကြံသကာအပြုံးတွေ ဝေလို့။ မတော်လို့များ ဟာ .. ခင်ဗျားနဲ့ လုံးဝ မသင့်ဘူး၊ ယူလို့ကတော့ စလယ်ဝင် ဖင်မမည်းခင် မဟုတ်ဘူး၊ ခြင်ထောင်တောင် ကြိုးချည်ဖြစ်မယ် မဟုတ်ဘူး ကွဲမှာလို့ ပြောချလိုက်ရင် ကောင်မလေးတွေ၊ အထူးသဖြင့် အပျိုကြီးတွေခမျာ ကြက်နာကျသလို မှိုင်ကျ သွားပါတယ်။ ဒါတောင် လက်မလျှော့သေးပါဘူး။ ယတြာ ချေရင် ရတယ်မှလား ဆိုပြီး ဗေဒင်ဆရာကို ဂဠုန် ဆားချက် ခိုင်းပါသေးတယ်။

အမှန်ကတော့ဗျာ။ ကိုယ်ကြိုက်လို့ ကိုယ်လိုက်ခဲ့ပြီပဲ။ ငရဲဆိုလည်း သွားနိုင်ရမှာပေါ့။ ဗေဒင်အရ မတည့်ဘူး၊ မသင့်ဘူး ဘာညာ ထောက်ခံစာ သွားတောင်းစရာ မလိုပါဘူး။ မတည့်ဘူး မသင့်ဘူးဟေ့ ဟောလိုက်ရင် ဘာလုပ်မှာလဲ။ ယတြာတွေ ပစ်စလတ်ခတ် ချေပစ်လိုက်မှာလား၊ ချေလို့ရော ချစ်ခရီးလမ်းက နိုင်လွန် ကတ္ထရာ ဖြစ်သွားမှာတဲ့လား။ မထင်ပါဘူး။ ချစ်သူကိုရော လမ်းခွဲမှာတဲ့လား။ မလုပ်ပါနဲ့။ တကယ်တမ်းသာ ပေပေါ် အတင်ခံနိုင်တဲ့ အချစ်စစ်ဆိုရင် ကံကြမ္မာက ဘယ်ပြန်ညာပြန် ထုနှက်ရင်တောင် ဖြုံမှာ မဟုတ်ပါဘူး။ ဝေးကာမှ ဝေးရော ကိုယ့်နှလုံးသားနဲ့ကိုယ် စတေးခံရဲကြမှာပါ။

အဲသလို ပြောလိုက်လို့ နှလုံးသား ဗလာကောင်ကြီးလို့ ပြောရင်လည်း ခံရမှာပါပဲ။ ကိုယ်ရေးကိုယ်တာ အထုပ်ဖြေရရင် ကျွန်တော့်မှာလည်း ချစ်သူ ရှိပါတယ်၊ ဇာတာချင်း ဘယ်လို တိုက်တိုက် မကိုက်ညီတာ များပါတယ်။ ဒါ့ကြောင့်လည်း အဆင်မပြေမှုတွေ၊ အခက်အခဲတွေ ကြားကနေ သူ့လက်ကလေးကို မနည်း ဆုပ်ကိုင် အားတင်းခဲ့ရတာပါ။ ဒီနေရာမှာ ဆရာ့ဆရာတွေ သြဝါဒအရ ဇာတာ မကိုက်ရင် ခပ်ဝေးဝေးနေ ဆိုတဲ့ အတိုင်း တစ်ယောက် တစ်မြေစီ ဝေးကွာနေတဲ့အခါကျတော့ အလိုအလျောက် ယတြာချေသလို ဖြစ်သွား စေခဲ့ပါတယ်။ မေတ္တာပို့တာက လွဲရင်လည်း တခြား ဘာယတြာမှ မလုပ်ဖြစ်ပါဘူး။ လုပ်ဖို့လည်း (ဘယ်လောက်သိထား၊ တတ်ထားပါစေ) မလုပ်ပါဘူး။

ဒါ့ကြောင့်လည်း မိတ်ဆွေတို့အနေနဲ့ ကိုယ့်မှာ ချစ်သူ (အမှန်အကန် ရင်ခုန်သံ မြန်စေသူ)နဲ့ လက်တွဲကြပြီ ဆိုရင် ဗေဒင်ဆရာဆီ ပြေး၊ ဇာတာချင်း တိုက်ဆိုင်တာထက် ကိုယ့်နှလုံးသားကို ကိုယ်တိုင် ဇာတာဖွဲ့ပြီး စစ်ဆေး သင့်ပါတယ်လို့ အကြံပြုပါတယ်။ ငါဘယ်လောက် သူ့ကို ချစ်သလဲ၊ ဘယ်လောက်ထိ သစ္စာ တည်နိုင်မလဲ၊ ဘယ်အချိန်ထိ အတူ ရှင်သန်ကြမလဲ မေးခွန်းတွေ မညှာမတာ ထုတ်ကြပါ၊ သတ္တိရှိရှိ မေးခွန်းတွေ နောက်မှာ ကြည်လင် ပြတ်သားတဲ့ အဖြေတစ်ခု ထွက်လာရင် ဘယ်လိုပဲ ဇာတာ မကိုက်ပါစေ၊ နေ့နံ မသင့်ပါစေ တွဲလက်တွေ မလွှတ်တမ်း ဆုပ်ကိုင်သွားပါလို့ ပြောပါရစေ။ ဝေးကာမှ ဝေးရောဗျာ။ ဘဝမှာ တကယ်ချစ်ဖူးသူနဲ့ ဆုံခဲ့ရတယ် ဆိုတာ ဆုလာဘ်တစ်ခုပဲ မဟုတ်လား။

တကယ်လို့များ ကျွန်တော်၊ ကျွန်မကဖြင့် သူ့ကို အမှန်အကန် ချစ်မြတ်နိုးပါတယ်၊ ဒါပေမယ့် သူက စပြီး ခွဲခွာသွားမှာ စိုးရိမ်လို့ပါ ဆိုပြီး စိတ်ထဲ မသိုးမသန့် ဖြစ်၊ အစွဲအလန်းကြီးနေဦးမယ် ဆိုရင်တော့ မြန်မာ့ရိုးရာ ဗေဒင်ပညာက ချစ်သူတွေအတွက် ခိုင်မြဲစေသော ယတြာနည်းစနစ်တွေကို လုပ်သွားနိုင်ပါတယ်။ မြန်မာ့ လက်ဆန်းဗေဒင်အရ အချစ်ရေးကို တနင်္လာက စိုးမိုးပါတယ်။ တခြား မိတ်ဓာတ်တွေ၊ အမည် အရင်းအဖျား တွေလည်း သုံးသပ်ကြတာပေါ့။ တနင်္လာဂြိုဟ် အနေအထား မကောင်းလို့ စိတ်နှလုံး ညိုးချူံး ရတာ၊ ကြေကွဲရတာတွေ ရှိသလို တနင်္လာ အနေကောင်းလွန်းလို့ တစ်ပင်မက သုံးပင်အထိ  ပတ်လိမ် နိုင်တဲ့ စန်းပွင့်လွန်းများ ကိုလည်း မြင်ခဲ့ဖူးပါရဲ့။

ဒီတော့ တနင်္လာ အားကောင်းစေတဲ့ ယတြာအဖြစ် ငှက်ကလေးတွေ လွှတ်ပေးတာ၊ ငှက်တွေကို အစာ ကျွေးတာ၊ ခွေးလေးတွေကို အစာကျွေးတာ ပုံမှန် လုပ်သွားနိုင်ပါတယ်၊ ငါးလေးတွေ ဇီဝိတဒါနအဖြစ် ရေအရှင် (မြစ်၊ချောင်း) တွေမှာ လွှတ်ပေးနိုင်ပါတယ်။ သတ္တဝါလေးတွေ အဆင်ပြေ၊ ဘေးရန်ကင်းသလို ကိုယ့်ချစ်ခရီးလမ်းလည်း ပန်းရနံ့သင်းပါစေလို့ ကိုယ့်နည်းကိုယ့်ဟန် ဆုတောင်းနိုင်ပါတယ်။ ဒီထက် နည်းနည်း အလုပ်ရှုပ် ခံ နိုင်ရင်တော့ ချစ်သူနဲ့ မိမိနံ နှစ်နံရဲ့ အညွှန့်နံ ပန်းခက်အညွှန့်တွေကို နေ့နံထောင့် နှစ်ခုမှာ လှူဒါန်း ပူဇော်နိုင်ပါတယ်။

အညွှန့်ဆိုတာက တခြားမဟုတ်ပါဘူး၊ ကိုယ့်မွေးနေ့ရဲ့ နောက်တစ်နေ့ဟာ အညွှန့်ပါပဲ၊ ဥပမာ တနင်္လာ သားသမီး ဆိုရင် သူ့ရဲ့ အညွန့်က အင်္ဂါပဲ ဖြစ်ပါတယ်။ ဒီတော့ တနင်္လာသားနဲ့ ကြာသပတေးသမီးက ချစ်သူတွေ ဆိုရင် တနင်္လာရဲ့ အညွှန့် အင်္ဂါနံ ပန်းနဲ့ ကြာသပတေးရဲ့ အညွန့် သောကြာနံ ပန်းတွေကို အတူ ပူးတွဲပြီး နေ့နံထောင့်တွေ အသီးသီးမှာ လှူဒါန်း ဆုတောင်းနိုင်ပါတယ်။ ဘယ်နေ့ ဘယ်အချိန်မှာ သွားလှူ ရမလဲ မမေးနဲ့ အားတဲ့ အချိန် အားတဲ့ရက်သာ သွားလှူပါ။ မကြာခဏလည်း လှူပါ။ ဓာတ်ထိလေ ကောင်းလေ ပေါ့ဗျာ။

နောက်ဆုံးပိတ်အနေနဲ့ ချစ်သူကို ရိုးမြေကျသာမက နောင်ဘဝတွေအထိပါ အစွဲအလန်းကြီးစွာ ပေါင်းဖက် လိုသူများအတွက် မြန်မာ့ရိုးရာ ဗေဒင်နဲ့နက္ခတ်က ဘဝ ဆက်တိုင်းဆက်တိုင်း ပေါင်းဖက်ချင်လျှင် ဆိုတဲ့ ဆောင်းပါးကို ထပ်ဆင့် လမ်းညွှန်လိုက်ပါတယ်။ ကျကျနန ဖတ်ပြီး တစ်သက်စာမက သံသာလေ ကမ်းတိုင် အထိ အတူတူ ကူးဖြတ်နိုင်ပါစေလို့ ဆန္ဒပြုလိုက်ပါတယ်။

1 comment:

dr.tin bo bo said...

ဒီဆောင်းပါးလေးကို အစ်ကို ထောက်ခံတယ်။ မှန်ပါတယ်။ တကယ်ချစ်ကြလို့ တကယ်ယူကြ တော့မယ်လို့ ဆုံးဖြတ်ပြီးရင် ဗေဒင်ဆရာဆီသွားပြီး တည့်လား မတည့်လား မေးမနေနဲ့။ ယူသာ ယူလိုက်ကြတော့။ ဗေဒင်ဆရာ အလိမ်အညာဆီကတော့ “သိပ်ကောင်းတာဘဲ” ဆိုတဲ့ ထောက်ခံချက် လိုချင်ရင်တော့ သွားပေါ့။ အမှန်အတိုင်းပြောတတ်တဲ့ ဆရာမှန်နဲ့ တွေ့လို့ မကောင်းဘူးဆိုရင်လည်း စိတ်ညစ်ရမယ်။ ခွင်ဖန်တဲ့ ဆရာနဲ့ တွေ့လို့ ကောင်းတော့မကောင်း ဘူး။ ဒါပေမယ့် ယတြာချေရင်တော့ ရတယ် ဆိုရင် လည်း “ဖွတ်ကလိဒင်္ဂါးတွေ” အိပ်ကပ်ထဲက ထွက်ပြီမှတ်။ ဒီကိစ္စက ဗေဒင်မေးလို့ အကျိုး မရှိပါဘူး။ မှန်ပါတယ်။ ဒီဆောင်းပါးကို လက်ထပ်ဖို့ ရည်ရွယ်ထားတဲ့ စုံတွဲတိုင်း ဖတ်သင့်တယ်။